Sól, sól skín á mig

Nú er bara komið sumar in London town, hér er sól og hlýja.

Sella var hér í næstum viku og nutum við góðra tíma saman, við fórum í leikhús í skólanum mínu, afmæli hjá Hreiðari, bíó á Confession of a Shopaholic,borðuðum út um alla borg, og svo fórum við að versla eitthvað smávegis aðallega bara á labba á milli veitingastaða samt. Það var algert æði að hafa Sellu hjá sér svona lengi og hlakka ég bara itl í að kíkja á hana einhvern tíman í Köben.

Svo er ég að fara að flytja eða allavega lýtur allt út fyrir það. Hér getið þið séð myndir af húsinu. Ég er að fara að búa með tveim íslendingum sem eru bæði með mér í skólanum. Við flytjum inn 20. apríl en fram að því er mikið að gerast.

Ég þarf að flytja út úr herberginu mínu áður en ég kem heim þannig ég þarf að pakka 0öllu hér, svo kem ég heim og fæ að sjá frábæru sýninguna RENT þar sem litla sys fer með stórt hlutverk og svo gerir maður eitthvað annað skemmtilegt heima. Svo fer ég aftur út og þá eru æfingar á leiksýningu sem ég er að frumsýna 21. apríl í skólanum þannig það verður nóg að gera þegar ég kem aftur út.

Jæja mig langaði bara að láta ykkur aðeins vita af mér, ég hlakka til að sjá ykkur öll hress á klakanum.

Þangað til næst
Stella

Veikindin náðu mér á endanum

Sælt veri fólkið
ég hef verið svona semí slöpp af og til síðan ég flutti, alltaf svona ég held að ég sé að verða veik en svo næ ég því alltaf af mér, en ekki í þetta sinn. Hiti og hálsbólga og almenn leiðindi hafa náð mér. Það er frekar óþolandi að vera ekki með Ebbu eða mömmu til að snúast í kringum sig þegar maður er veikur, maður þarf að útbúa sinn mat sjálfur sem er auðvitað út í hött!
En ég hef ákveðið að ná heilsu fyrir miðvikudaginn því þá kemur Sella mín í heimsókn og það verður sko partý :)
Fyrri hluti síðustu viku sem var eins og áður hefur komið fram OLA dagar var bara með þeim leiðinlegri síðan ég flutti hingað, okkur fyrsta árs nemunum kemur ekkert sérlega vel saman við annað árið. En á fimmtudaginn var svona klúbbkvöld í skólanum eða Purpel Thursday á Plastic Red (ég veit að þetta hljómar einkennilega) ég fór svo að kalla þetta Purple Onion eins og einn félagi minn kallaði þetta hérna. Það var svaka stuð á okkur, ég held að ég hafi ekki dansað svona mikið síðan helgina áður en ég fluttist hingað þegar við fórum nokkur á Tinu Turner show.
Svo var föstudagurinn tekinn í afslappelsi. Á laugardaginn var ég ásamt aðalframleiðandanum Tom og leikstjóranum Kim með prufur fyrir leiksýninguna Atr Truth and Politics svo fór ég bara út í búð sem betur fer því annars væri ekkert til hérna því ég komst ekki út í gær og svo sannarlega ekki í dag.
En jæja ætla að fara að koma mér upp í sófa að horfa á 90210 ég veit að það er ekki mjög töff en Brenda er í því og eins og Svanhvít skrifaði einhvern tíman í einhverja minningabók sem ég átti þá var lífsmarkmið mitt að verða eins og Brenda í Beverly Hills og viti menn hún er í leikhúslífinu í 90210 hver veit kannski bara hitti ég minn Dylan á næstunni :)
Þangað til næst
Stella

Brit 2009 og leti

Brit verðlaunin
Fyrst ég bý nú í Bretlandi varð ég nú að horfa á The Brit Awards og verður að segjast að það var áhugavert.

Girls Aloud eru eitthvað það hræðilegasta sem ég hef séð, þær syngja falskt og ein þeirra var svo full á siðinu að það var nú varla fyndið.

Duffy er svo sæt og næs eitthvað, hún vann 3 verðlaun og fyrir mér áttu hún það alveg skilið. Kate Perry vann samt Beyonce sem besta alþjóðlega söngkonan sem ég skil ekki alveg því Kate Perry hefur gefið út hvað 2 lög og þau eru nú bara lala.

Svo er eitt sem ég verð að segja gefa U2 bara út eins lög? ég veit ekki mér finnst allt nýtt frá þeim vera eins og það gamla einhvern veginn... Coldplay líka alltaf eins... báðar hljómsveitir góðar og allt það en ekkert spennandi lengur.

Og Já Take That var þetta ekki búið??? Why ohh why þeir voru búnir þegar Robbie hætti en svo bara come back og þeir eru vinsælli en nokkru sinni fyrr. og enn og aftur alveg eins tónlist og fyrir 10 árum.

Mér fannst Kings of Leon og Duffy mjög góð á hátíðinni þau geta sungið Live og svo voru Pet Shop Boys frekar skemmitlegir.

Leti í kellu
Ég er hér að gera verkefni sem á að skila á mánudaginn sem er svona Press pack um sýningu af mínu vali, engin geimvísindi en samt tekur tíma og stundum (alltaf) langar mig að gera eitthvað annað eins og að horfa á Seinfeld.

Ég fór inn til London í gær það var mjög gaman, fór með Árna sem er á öðru ári í leikstjórn skólanum mínum. Við fórum á skemmtilegt svæði hjá Charing cross sem heitir Seven dials og það eru sjö verslunargötur sem eru tengdar með litlu torgi, fullt af skemmtilegum litlum búðum sem selja hönnunarvörur og ekki neitt Primark eða þannig verslanir. Ég verslaði reyndar ekkert því þetta er frekar dýrt hverfi en næst þegar ég ætla að vera góð við mig þá kíki ég þangað, bókað :)

Ég er búin að bóka far heim, ég kem heim þann 27 mars á föstudagskvöldi og fer svo til London aftur miðvikudaginn 15. apríl, þannig Ísland fær að njóta mín í 2 og hálfa viku.

Framundan
Svo er næsta vika OLA vika (organising live arts) annað árið er að skipuleggja ef skipuleggja skyldi kalla 3 viðburði sem við fyrsta árs nemarnir þurfum að hjálpa þeim við, það verður áhugavert. Svo er eitthvað danskvöld á fimmtudaginn þannig að það er nóg framundan í næstu viku sem á eftir að láta hana líða eins og elding.

Svo er skemmtilegt frá því að segja að Sella mín er að koma til mín þann 4 mars og verður hjá mér til 10 mars, Guð hvað ég hlakka til.

Þangað til næst
Stella

London, Ísland, London

Nú er ég komin heim til Sidcup eftir að hafa lagt af stað heiman frá mér klukkan 3 í dag og kom heim á miðnætti þannig að það er ágætt ferðalag verð ég að segja miðað við að flug frá RVK til LONDON er rúmir tveir tímar.

Áður en ég kom til Íslands þá fór ég að sjá leikrit sem heitir Fairtrade sem Emma Thompson framleiddi einmitt, sýningin var frábær og fjallaði um mannsal. Emma Thompson og fleiri komu svo eftir sýninguna og svöruðu spurningum. Ég hugsaði um þetta þegar ég var svo á leiðinni heim og hvað þetta gæti nú ekki verið eins á Íslandi því það er svo erfitt að smygla fólki inn í landið en svo sá ég bara í fréttunum nokkrum dögum síðar að það er nóg um Mannsal heima. Sorglegt og vonandi getum við gert eitthvað í því svo þetta verði ekki eins og hér í London.

Svo á fimmtudagsnóttina bíð ég og bíð eftir niðurstöðum úr stúdentaráðskonsningum í Háskóla Íslands, og um tvöleitið fæ ég sms sem segir Vaka vann!!! ég var þá auðvitað komin upp í rúm og gat ekki annað en öskrað JEY og þá fattaði ég að ég væri ekki ein heima og þagnaði þá :) en svo héldu smsin áfram að streyma inn á síman og ég get sagt ykkur það að brosið fór bara ekki af mér. VAKA vann með 202 atkvæðum og ég er svo stolt af þeim að hafa náð þessum árangri en ég er auðvitað stoltust af honum Hlyn sem var hringistjóri í kosningunum og svo auðvitað hinum Breiðhyltingunum sem sýndu Röskvu í tvo heimana.

Svo fór ég heim og átti frábæran tíma þar ég hitti fullt af vinum og fjölskyldu, fór í leikhús, bíó, bæinnx2 meira að segja, hélt matarboð, fór í kaffiboð og svo margt fleira. Það sem stendur upp úr svoldið er leikhúsferðin þar sem ég sá Rústað eftir Söruh Kane og það var ógeðslegt en mjög flott. Sviðsmyndin var samt eiginlega svoldill toppur á þessu öllu saman því í miðri sýningu kemur sprenging og sviðsmyndin losnar í sundur og dettur um eina hæð og það er bara svo brilliant að það er ekki fyndið.

En ég ætti kannski að fara að halla mér...
þangað til næst
Stella

Lundúnir hafa lokað, vinsamlegast kannið stöðuna aftur síðar

Jæja Lundúnir eru bara lokaðar í dag úti er 20 til 30 cm snjór svona þar sem mest er og þá bara virkar ekkert í London, lestarnar, strætó, leigubílar, skólar og þið vitið allt annað er lokað. Skólinn minn var m.a. lokaður í dag vegna veðurs, bara svona til að þið skiljið hvernig þetta er þá er ekkert rok, engin leiðindi bara fallegt veður.

Í dag fór ég út með Emmu, Liz (stelpurnar sem ég bý með) og JD (kærasti Liz) til þess að kenna þeima að búa til snjókarl. við bjuggum til snjókonu alveg 4 kúlur en hún er núna aðeins of mikið að halla undir flatt ;) ég held að hún verði komin í jörðina þegar ég vakna í fyrramálið.

Annars vona ég bara að samgöngurnar fari að virka svo ég komist að sjá Emmu Thompsson og svo auðvitað svo ég nái að komast út á Standsted til að taka flugið til Íslands

Þangað til næst
Stella

Hennar tími kom víst

Jæja ég ætla ekkert að breyta þessu bloggi í eitthvað pólitískt blogg en ætli maður geti komist hjá því að segja að Jóhanna Sigurðardóttir er ansi þrjósk kona og henni tókst áætlunarverk sitt þó það hafi tekið nokkur ár en hennar tími er víst kominn.

Jæja nú sit ég við gluggann minn hér í Sidcup og horfi á hvíta jörð, það hefur snjóað allmikið hér fólk þarf að fara að skafa í fyrramálið ef það er í raun hægt að keyra því bílarnir og bílstjórarnir eru ekki alveg nógu klárir í þennan snjó. Það er svoldið sætt það kemur smá snjóþekja og allir bretarni hljópa út til að búa til litla snjókarla og fara í snjókast. Mér finnst þetta rosalega cute en ég fór nú ekki út í snjókast en ég lánaði íslensku ullarvetlingana mína og þeir voru víst hlýjir :)

Undanfarið hef ég verið að vinna að sýningu sem við frumsýndum fyrir rúmri viku og vorum með tvær sýningar og það gekk bara ágætlega hjá okkur, það var gaman að kynnast öllu þessu fólki og læra svoldið á það hvernig allt virkar í skólanum.

Svo er ekki mikið meira að frétta nema að ég er að koma heim á föstudaginn og já.... á miðvikudaginn er ég að fara að sjá leiksýningu sem er framleidd af ekki ómerkari konu en Emmu Thompson og eftir sýninguna er svona Spurt og svarað sem Emma Thompson mun einmitt stýra og ætli ég reyni ekki að henda einni spurningu til Emmu :)

Þangað til næst
Stella

Fólk sem er Íslandi til smánar

Það er ekki hægt að segja annað en síðustu dagar hafi verið hreint út sagt sorglegir. Ég bið góðan Guð um skjótan og góðan bata fyrir Geir og auðvitað Ingibjörgu líka.

Ég verð að segja að fólk eins og Hörður Torfason og Þráinn Bertilsson eru menn sem minna mig helst á ógeðslega kvikmynd þar sem handritið er um einhverja hrotta sem versna bara með hverri senu og einhvern veginn trúir maður ekki að þetta geti versnað en jú jú það versnar bara. Ég óska þeim ekki neins ills en ég óska þess að þeir sjái samt hversu ljótan hlut þeir hafi gert og sjái að sér og viðurkenni sín mistök eins og þeir eru svo æstir í að aðrir geri.

Svo er annað þetta lið sem er að mótmæla með ofbeldi, ég vildi helst loka þetta lið allt inni, þau eru ekki bara sér til skammar heldur Íslandi, landinu sem þeim þykir víst svo rosalega vænt um. Ég er orðin bálreið út í þetta fólk ég skammaðist mín ekkert hér þegar bankarnir hrundu fyrir að vera íslensk, ég fór út með höfuð hátt og hefði öskrað það í Downingstræti 10 að ég væri íslensk. En í dag skammast ég mín mjög fyrir hvernig hluti þjóðarinnar lætur, þetta er eins og hinn versti skrípaleikur. Greyið lögreglumennirnir eru í stórhættu, stjórnmálamennirnir geta varla komið út úr Alþingi og svo er bara spursmál hvenær þetta lið ræðst á óbreytta borgara.

Það þarf ekkert að hafa fleiri orð um þetta. En kíkið á grein eftir Diljá Mist vinkonu minnar á Deiglunni hann er harðorður en hún hefur nú ekki verið þekkt fyrir að segja neitt annað en það sem henni finnst. Ég var sammála held ég nánast hverju einasta orði í þessum pistli.

Svo líka fyrir þá sem halda að Steingrímur J sé málið bið ég ykkur um að lesa þetta og hugsa ykkur tvisvar um áður en þið veljið hann sem næsta forsætisráðherra, og ég bið nú til Guðs að það geri enginn sem ég þekki. Deiglan

Annars er allt gott af mér að frétta ég set inn einhverjar fréttir síðar.